ទៅណាមិនឆ្ងាយ Zidane នៅតែចង់បានខ្សែប្រយុទ្ធកំពុងលេចធ្លោរូបនេះ មកលេងឲ្យ Real Madrid

អេស្ប៉ាញ៖ អ្នកចាត់ការទូទៅរបស់ Real Madrid លោក Zinedine Zidane ត្រូវបានរាយការណ៍មកថា បានដាក់ការចង់បានទៅលើខ្សែប្រយុទ្ធរបស់ Borussia Dortmund កីឡាករ Erling Braut Haaland គឺជាគោលដៅចម្បងក្នុងការនាំចូល។

បើទោះបីជាទើបតែផ្លាស់ទៅកាន់ទឹកដីអាល្លឺម៉ង់កាលពីទីផ្សារខែមករាកន្លងទៅ ប៉ុន្តែ Haaland រកបានគ្រាប់បាល់ដល់ទៅ១២គ្រាប់ ពីការបង្ហាញខ្លួនត្រឹម១១ប្រកួតប៉ុណ្ណោះឲ្យ Dortmund គ្រប់ព្រឹត្តិការណ៍ទាំងអស់។

Dortmund ធ្លាប់បានបង្ហើបថាភាគីខាងក្លិបអាចនឹងលក់ខ្សែប្រយុទ្ធជម្រើសជាតិន័រវែសរូបនេះ ប៉ុន្តែក្លិបនៅចង់រក្សារូបគេឲ្យលេងបានពេញមួយរដូវកាលនេះសម្រាប់រដូវកាលក្រោយ។ យ៉ាងណាមិញ បើតាមការចុះផ្សាយរបស់កាសែត Marca ក្លិបយក្សអេស្ប៉ាញ Real Madrid នឹងដាក់សំណើក្នុងការនាំយក Haaland នៅរដូវក្ដៅលើកក្រោយ។

ក្រោយការនាំចូល Luka Jovic មិនអាចបំពេញតាមតម្រូវការបាន ប្រភពព័ត៌មានបានឲ្យដឹងថា លោក Zidane ចង់នាំយកខ្សែប្រយុទ្ធថ្មីមួយរូបផ្សេងទៀតដើម្បីអាចមកជំនួសកន្លែងរបស់កីឡាករចាស់វស្សា Karim Benzema។

ចំពោះតម្លៃខ្លួនរបស់ Haaland វិញ បើសិនជាមិនមានអ្វីប្រែប្រួលទេ តម្លៃនៃការទិញផ្ដាច់កុងត្រារបស់គេគឺប្រមាណជា ៦៣លានផោន៕

ប្រភព៖ SportsMole