អង់គ្លេស៖ អនាគតរបស់ខ្សែបម្រើសញ្ជាតិហូឡង់ Georginio Wijnaldum ជាមួយក្លិបហង្សក្រហម Liverpool នៅមានភាពស្រពេចស្រពិលខណៈដែលកុងត្រារបស់គេជាមួយក្លិបម្ចាស់ពាន Premier League រដូវកាលមុនមួយនេះនឹងផុតកំណត់នៅចុងបញ្ចប់រដូវកាលហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កន្លងមក Liverpool ព្យាយាមស្នើកុងត្រាបន្តដល់កីឡាករវ័យ៣០ឆ្នាំរូបនេះដែរប៉ុន្តែ Wijnaldum ស្នើសុំពន្យាពេលពេលធ្វើការសម្រេចចិត្តបន្ទាប់ពីក្លិបអ្នកមានបុណ្យ Barcelona បានព្យាយាមអូសទាញរូបគេឲ្យទៅចូលរួមនៅទឹកដី Camp Nou ខណៈលោកគ្រូបង្វឹក Ronald Koeman ចង់បាន Wijnaldum មកពង្រឹងតំបន់បម្រើ។
យោងតាមសារព័ត៌មាន Gazetta della Sport គឺក្លិបអ៊ីតាលី Inter Milan ក៏ចង់បាន Wijnaldum ទៅចូលរួមជាមួយដែរ។ប៉ុន្តែថ្មីៗនេះស្រាប់តែផ្ទុះពាក្យចចាមអារ៉ាមថាក្លិប គូប្រជែងក្នុងលីគរបស់ Liverpool គឺ Wolves ក៏កំពុងសម្លឹងឃើញ Wijnaldum ដោយក្លិបចង់យករូបគេមកជំនួសខ្សែបម្រើ Joao Moutinho ដែលមានអាយុដល់ទៅ៣៤ឆ្នាំទៅហើយ។
គេមិនទាន់ដឹងនៅឡើយទេថា WIjnaldum នឹងសម្រេចចិត្តស្នាក់នៅ Liverpool ឬទៅចូលរួមជាមួយក្លិប៣ក្នុងចំណោមនោះប៉ុន្តែ Liverpool ពិតជាចង់ចងជើងខ្សែបម្រើរូបនេះឲ្យនៅជាមួយពួកគេ។
Liverpool បានទិញយក Georginio Wijnaldum កាលពីឆ្នាំ២០១៦ក្នុងតម្លៃខ្លួន ២៣លានផោន(ស្មើនឹងប្រមាណ៣១.៣លានដុល្លារ)ពីក្លិប Newcastle ហើយទោះបែកធ្លាយព័ត៌មានថាគេមិនទាន់បន្តកុងត្រាជាមួយ Liverpool ក៏ដោយក៏កីឡាករម្នាក់នេះនៅតែជាប់ជម្រើស១១នាក់ដំបូងក្រោមការដឹកនាំរបស់លោកគ្រូបង្វឹក Jurgen Klopp ដែលនៅរដូវកាលនេះគេចូលលេងឱ្យ Liverpool បាន២២លើក។
លោកគ្រូ Klopp នៅតែលើកសរសើរ Wijnaldum ទោះមួយរយៈនេះមានការរិះគន់ពីទម្រង់លេងរបស់គេយ៉ាងណាក៏ដោយ។លោកគ្រូបានថ្លែងកាលពីខែមុនថា៖
ខ្ញុំមិនអាចនិយាយអីច្រើនពីរឿងនេះទេ ខ្ញុំនឹងសប្បាយចិត្តបើសិនគេព្រមស្នាក់នៅបន្តជាមួយពួកយើង ខ្ញុំសប្បាយចិត្តពេលឃើញ Gini(Wijnaldum)បានជាប់ជម្រើស១១នាក់ដំបូង។ គេតែងតែលេងបានល្អអ៊ីចឹងហើយទើបគេចូលលេងបានច្រើនប្រកួត ខ្ញុំមិនចាំទេថាគេលេងមិនសូវបានល្អនៅការប្រកួតណាខ្លះ។
ប្រភព៖ mirror
Bong I.T