អឺរ៉ុប៖ ពិតណាស់ ខ្សែប្រយុទ្ធ Lionel Messi របស់ក្រុម ​Paris Saint-Germain បានស៊ុតបញ្ចូលទីចំនួន២គ្រាប់ ក្នុងជំនួបទល់នឹងក្រុម Club Brugge នៅ ឯកីឡដ្ឋាន Parc des Princes កាលពីយប់មិញនេះ។

យ៉ាងណាមិញ តាមរយៈគ្រាប់បាល់ចំនួន ២គ្រាប់បន្ថែមនេះដែរ បានធ្វើឲ្យចំនួនគ្រាប់បាល់ពីការប្រកួតផ្លូវការ ក្នុងអាជីពបាល់ទាត់របស់ Messi កើនឡើងដល់ ៧៥៧គ្រាប់ហើយ ដែលស្មើនឹងចំនួនគ្រាប់បាល់របស់វីរបុសប្រេស៊ីល លោក Pele ដែរ។

កន្លងមក Messi ក៏ធ្លាប់បំបែកកំណត់ត្រា ជាកីឡាករដែលរកបានគ្រាប់បាល់ច្រើនបំផុត ដោយគិតចំពោះតែក្លិបមួយ (ខណៈពេលលេងនៅ ​ Barcelona) និងជាកីឡាករជម្រើសជាតិមកពីទ្វីបអាហ្រ្វិកខាងត្បូង ដែលរកគ្រាប់បាល់បានច្រើនបំផុត។

ទោះជាយ៉ាងណា ខ្សែប្រយុទ្ធសញ្ជាតិអាហ្សង់ទីនរូបនេះ ត្រូវការគ្រាប់បាល់បន្ថែមទៀត ដើម្បីក្លាយជាកីឡាកររកគ្រាប់បាល់បានច្រើនបំផុត ក្នុងប្រវត្ដិសាស្ដ្របាល់ទាត់។ ខណៈបច្ចុប្បន្ន អ្នកកំពុងកាន់កាប់កំណត់ត្រានេះ គឺខ្សែប្រយុទ្ធសញ្ជាតិអូទ្រីស លោក Josef Bican ដែលមានចំនួន ៨០៥គ្រាប់៕

ប្រភព៖ tribuna