ច្បាស់ការ! I.Miami បានព្រមព្រៀងនាំយកវីរបុរស Barca រូបនេះមកធ្វើជាគ្រូបង្គោលថ្មីហើយ តែមិនមែន Xavi ទេ

បរទេស៖ ក្លិបអ្នក Inter Miami ត្រូវបានគេរាយការណ៍ថា បានឈានដល់កិច្ចព្រមព្រៀងក្នុងការនាំយកអតីតវីរបុរស Barcelona លោក Javier Mascherano មកធ្វើជាគ្រូបង្គោលថ្មីរបស់ពួកគេហើយ។

ជាការពិតណាស់ កាលពីពេលថ្មីៗនេះ ក្លិប Inter Miami បានប្រកាសចែកផ្លូវគ្នាជាផ្លូវការជាមួយគ្រូបង្វឹកលោក Gerardo Martino ក្រោយលោកដឹកនាំក្លិបនៅលីគ Major League Soccer មួយនេះបានរយៈពេល ១ ឆ្នាំជាង ពោលគឺពីខែ កក្កដា ឆ្នាំ ២០២៣ ដល់ខែ វិច្ឆិកា ឆ្នាំ ២០២៤ នេះ។

យោងតាមការចុះផ្សាយដោយអ្នកកាសែត អ៊ីតាលី លោក Fabrizio Romano បានឱ្យដឹងថា លោក Javier Mascherano បានយល់ព្រមមកកាន់តំណែងជាអ្នកចាត់ការបន្ទាប់របស់ Inter Miami ហើយ។

ប្រភពដដែលបានបន្ថែមថា បុរសសញ្ជាតិ អាហ្សង់ទីន វ័យ ៤០ ឆ្នាំរូបនេះបាននឹងចុះកុងត្រារយៈ ៣ ឆ្នាំក្នុងការស្នាក់នៅទឹកដី Chase Stadium។

គួរបញ្ជាក់ថា ក្នុងការកាន់ការងារជាគ្រូបង្វឹក លោក Javier Mascherano ធ្លាប់មានបទពិសោធន៍ដឹកនាំក្រុមឈុតយុវជនរបស់ អាហ្សង់ទីន បានរយៈពេល ៤ ឆ្នាំ ក្នុងនោះលោកបានដឹកនាំឈុត U-២៣ និង U-២០៕

ប្រភព៖ Fabrizio Romano