ខកចិត្តច្រើនលើកពេក ឥឡូវលោក Ancelotti សម្រេចចិត្តជ្រើសរើសកីឡាកររូបនេះឱ្យរ៉ាប់រងបាល់ប៉េណាល់ទីម្នាក់ឯងដាច់តែម្តង

បរទេស៖ អ្នកចាត់ការរបស់ Real Madrid លោក Carlo Ancelotti ត្រូវបានគេរាយការណ៍ថា បានសម្រេចចិត្តច្បាស់លាស់ហើយ ថាលោកនឹងជ្រើសរើសកូនក្រុមម្នាក់ ដែលលោកទុកចិត្តបំផុត ដើម្បីរ៉ាប់រងលើការទាត់បាល់ពិន័យ ១១ ម៉ែត្រ (Penalty)។

ជាការពិតណាស់ បន្ទាប់ពីខ្សែបម្រើប្រយុទ្ធ Jude Bellingham បានខកខានឱកាសស៊ុតបាល់ពិន័យ ១១ ម៉ែត្រទល់នឹងក្រុម Valencia កាលពីថ្ងៃ សៅរិ៍ ទី ៤ ខែ មករា កន្លងទៅ លោក Ancelotti ហាក់មានការខកចិត្តជាខ្លាំង ទោះ Real Madrid បានយកឈ្នះ ២-១ ក៏ដោយ ដោយលោកបានមានប្រសាសន៍ថា "វាគឺគួរឱ្យធុញណាស់ ដែលយើងបានខកខានការស៊ុតបាល់ប៉េណាល់ទីដល់ទៅ ៣ លើក។ ខ្ញុំគិតថា ខ្ញុំត្រូវតែទទួលខុសត្រូវ ដើម្បីជ្រើសរើសនរណាម្នាក់ ដែលនឹងត្រូវរ៉ាប់រងលើរឿងនេះ"។

យ៉ាងណាមិញ ថ្មីៗនេះអ្នកកាសែតអ៊ីតាលីលោក Fabrizio Romano បានចុះផ្សាយថា លោក Ancelotti បានសម្រេចចិត្តរួចរាល់ហើយ ដោយចាប់ពីពេលនេះតទៅលោកនឹងឱ្យ Vinicius Jr. ជាអ្នករ៉ាប់រងស៊ុតបាល់ពិន័យ ១១ ម៉ែត្រនេះផ្តាច់មុខតែម្តង។

គួរបញ្ជាក់ថា ស្ថិតិនៃការស៊ុតបាល់ប៉េណាល់ទីរបស់កីឡាករ Real Madrid នៅរដូវកាលនេះ គឺ Kylian Mbappe បានខកខាន ៣ ដង ក្នុងចំណោមការស៊ុត ៥ ដង រីឯ Jude Bellingham បានខកខាន ១ ដង ក្នុងចំណោមការស៊ុត ២ ដង និង Vinicius វិញគឺស៊ុត ៣ ដង ជោគជ័យទាំង ៣ ដង, នេះបើតាមស្ថិតិដែលដកស្រង់ចេញពី Realtotal.de។

ដកស្រង់ និងកែសម្រួលអត្ថបទ៖ Keylatop