កាន់តែល្អទៅៗហើយ! Lamine Yamal ស៊ុតមិញអូសស៊ុតមួយគ្រាប់ល្អដូចផ្កា ជួយឱ្យ Barca លត់ R.Betis ៥-១(មានវីដេអូ)

បរទេស៖ នាយប់រំលងអាធ្រាត្រឈានចូលថ្ងៃទី ១៦ ខែ មករា ឆ្នាំ ២០២៥ នេះ ក្រុម Barcelona បានបើកទ្វាកីឡដ្ឋាន Estadi Olimpic Lluis Companys របស់ខ្លួន ទទួលស្វាគមន៍ក្រុមភ្ញៀវ Real Betis នៅក្នុងការប្រកួតវគ្គ ១៦ ក្រុមចុងក្រោយនៃពានរង្វាន់ Copa del Rey។

ជាការពិតណាស់ នៅក្នុងការប្រកួតនោះ ខាងក្រុមម្ចាស់ផ្ទះ Barcelona ពិតជាធ្វើបានល្អមែនទែន ដោយបញ្ចប់ការប្រកួត ៩០ នាទីពេញ ពួកគេបានយកឈ្នះលើក្រុម Real Betis ក្នុងលទ្ធផលយ៉ាងចាស់ដៃ ៥ ទល់នឹង ១។

ក្នុងនោះ ៥ គ្រាប់របស់ Barcelona គឺរកបានដោយ Gavi នៅនាទីទី ៣, Jules Kounde នៅនាទីទី ២៧, Raphinha នៅនាទីទី ៥៨, Ferran Torres នៅនាទីទី ៦៧ និងចុងក្រោយរកបានដោយ Lamine Yamal នៅនាទីទី ៧៥។ ចំណែក ១ គ្រាប់របស់ Real Betis វិញ គឺរកបានដោយ Vitor Roque នៅនាទីទី ៨៤ តាមរយៈបាល់ពិន័យ ១១ ម៉ែត្រ។

គួរបញ្ជាក់ថា ក្រោយជ័យជម្នះនេះ បានធ្វើឱ្យ Barcelona កក់កៅអីឡើងទៅកាន់វគ្គ ៨ ក្រុមចុងក្រោយនៃពានរង្វាន់ Copa del Rey ហើយ ខណៈការប្រកួតបន្ទាប់ គឺត្រូវរង់ចាំការចាប់ឆ្នោតនៅថ្ងៃទី ២០ ខែ មករា សិន។

សូមទស្សនាវីដេអូហាយឡាយខាងក្រោម៖