ញាក់សាច់! Arsenal គ្រោងបោះលុយក្បែរ ៨០ លានផ្ទេរយកតារាឆ្នើមរបស់ Barca រូបនេះ

បរទេស៖ យោងតាមការចុះផ្សាយដោយសារព័ត៌មាន Fichajes.net បានឱ្យដឹងថា ក្លិបកាំភ្លើងធំ Arsenal នឹងដាក់សំណើជាទឹកប្រាក់ទៅ Barcelona ចំនួន ៧៥ លានអឺរ៉ូ ឬប្រមាណជា (៧៩ លានដុល្លារអាមេរិក) ដើម្បីផ្ទេរយកខ្សែបម្រើ Frenkie de Jong នៅរដូវក្តៅខាងមុខ។

ជាការពិតណាស់ ចាប់តាំងពីផ្លាស់ចេញពី Ajax មកចូលរួមជាមួយ Barcelona នៅរដូវក្តៅឆ្នាំ ២០១៩ ក្នុងតម្លៃខ្លួន ៨៦ លានអឺរ៉ូ ឬប្រមាណជា (៩០ លានដុល្លារអាមេរិក)​ De Jong ហាក់បង្ហាញសមត្ថភាពពុំសូវបានជាប់លាប់ប៉ុន្មានទេ ប៉ុន្តែនៅរដូវកាលថ្មីនេះក្រោមការដឹកនាំរបស់អ្នកចាត់ការលោក Hansi Flick ខ្សែបម្រើសញ្ជាតិ ហូល្លង់ ត្រូវបានគេមើលឃើញថា កំពុងតែត្រលប់មករកភាពល្អបំផុតរបស់គាត់ពីមុនម្តងបន្តិចៗហើយ។

ទោះបីជាយ៉ាងណាក៏ដោយ ថ្មីៗនេះ Barcelona ត្រូវបានគេរាយការណ៍ថា ហាក់មានបំណងចង់លក់ De Jong ចេញ ដើម្បីកាត់បន្ថយនូវចំណាយមួយចំនួនរបស់ក្លិប។ ដូច្នេះហើយ ការផ្តល់ជូនសំណើរបស់ Arsenal ចំនួន ៧៥ លានអឺរ៉ូ ឬប្រមាណជា (៧៩ លានដុល្លារអាមេរិក) អាចនឹងជាតម្លៃដ៏សមរម្យមួយ ប្រសិនបើក្រុមអ្នកមានបុណ្យពិតជាសម្រេចចិត្តចង់លក់ខ្សែបម្រើវ័យ ២៧ ឆ្នាំរូបនេះចេញមែន។

ប្រភព៖ Sportskeeda