អេស្ប៉ាញ៖ យោងតាមសេចក្ដីរាយការណ៍បានឲ្យដឹងថា ក្លិប Paris Saint-Germain កំពុងសម្លឹងរកមើលលទ្ធភាព ក្នុងការផ្ទេរយកខ្សែប្រយុទ្ធក្រុម Barcelona កីឡាករ Luis Suarez ឲ្យមកលេងជុំគ្នាជាមួយអតីតដៃគូរបស់គេ កីឡាករ Neymar ។

Saurez ត្រូវបានគេរាយការណ៍មកថា ជាកីឡាករម្នាក់ ក្នុងចំណោមកីឡាករផ្សេងៗទៀតដែល Barca គ្រោងបញ្ចេញ ដើម្បីរុះរើក្រុម។ ក្នុងនោះដែរ បើតាមរបាយការណ៍របស់កាសែតអេស្ប៉ាញ Sport ក្លិប PSG កំពុងរង់ចាំការបញ្ជាក់ផ្លូវការណាមួយ ពីក្លិបយក្សតំបន់កាតាឡាន់ ជុំវិញការអនុញ្ញាតឲ្យខ្សែប្រយុទ្ធសញ្ជាតិអ៊ុយរ៉ាហ្កាយចាកចេញដោយមិនមានតម្លៃខ្លួន ជាមុនសិនទើបពួកគេដាក់សំណើផ្ទេរយក។

ប្រភពដដែលបានបន្ថែមទៀតថា Suarez បានធ្វើការពិភាក្សាយ៉ាងច្រើនហូរហែ តាមរយៈទូរស័ព្ទ ជាមួយនឹងប្រធានផ្នែកកីឡារបស់ក្លិប Ajax លោក Marc Overmars ដោយរូបគេបានបដិសេធ មិនព្រមធ្វើការផ្ទេរទៅក្លិបយក្សហូឡង់ ដែលជាក្លិបចាស់របស់គេមួយនេះនោះទេ។

Barca មានគម្រោងបញ្ចេញខ្សែប្រយុទ្ធវ័យ៣៣ឆ្នាំ ដើម្បីកាត់បន្ថយការចំណាយប្រាក់ពលកម្ម ដ៏ច្រើនសន្ធឹកសន្ធាប់ ១សប្ដាហ៍២៩ម៉ឺនផោនរបស់គេ។ មិនត្រឹមតែប៉ុណ្ណោះ បើយោងតាមការចុះផ្សាយរបស់កាសែត RAC1 របស់អេស្ប៉ាញ គ្រូបង្វឹកថ្មីក្រុមរហស្សនាមអ្នកមានបុណ្យ លោក Ronald Koeman ក៏បានបញ្ជាក់ប្រាប់ ម្ចាស់អាវលេខ៩រូបនេះ តាមរយៈទូរស័ព្ទដែរថា រូបគេមិនស្ថិតក្នុងគម្រោងប្រើប្រាស់របស់លោកនោះទេ។

គួររម្លឹកដែរថា Suarez ជាអ្នករគ្រាប់បាល់បានច្រើនជាងគេ លំដាប់ទី៣ប្រចាំក្លិប Barcelona ពោលចាប់តាំងពីចាកចេញពីក្លិប Liverpool មកកាន់ទឹកដី Camp Nou ក្នុងឆ្នាំ២០១៤មក គេស៊ុតបាន១៩៨គ្រាប់ ថែមទាំងបញ្ជូនបាល់ឲ្យមិត្តរួមក្រុមសម្រេចទីបាន១០៩ដង ក្នុងចំណោមការបង្ហាញខ្លួន ២៨៣ប្រកួត៕

ប្រភព៖ dailymail