Klopp ថាមួយ​​គ្រាប់​​របស់ ​Fulham​ សុទ្ធ​​ចូល​​កូន​​ក្រុម​​ខ្លួន​ពី​​យប់​​មិញ​ជា ​«គ្រាប់​​មិន​ត្រឹម​ត្រូវ»

អង់គ្លេស៖ ការប្រកួតប្រចាំសប្តាហ៍ទី ១២ នៃក្របខណ្ឌលីគកំពូលអង់គ្លេស (Premier League) ក្លិបការពារតំណែង​ជើងឯក Liverpool បានត្រឹមចែកគ្នាម្នាក់ ១ ពិន្ទុជាមួយក្លិបម្ចាស់ផ្ទះ Fulham កាលពីយប់មិញនេះ។ ទោះយ៉ាងណា ក្រោយបញ្ចប់ការប្រកួតលោក Jorgen Klopp បានបញ្ចេញមតិខ្លួនរិះគន់ថា គ្រាប់ទាត់បញ្ចូលទីកូនក្រុមរបស់​លោក​មិនសក្តិសមនឹងផ្តល់ឲ្យនោះទេ។ 

ក្នុងការប្រកួតខាងលើ ក្លិបម្ចាស់ផ្ទះ Fulham បានបើកការនាំមុខតាំងពីនាទី ២៥ ដោយកីឡាករ Bobby Reid ខណៈភ្ញៀវបានវាយបកត្រឡប់តាមស្មើរវិញយ៉ាងប្រផិតប្រផោយនៅនាទី ៨០ ដោយបាល់ពិន័យ ១១ ម៉ែត្រ និង​សម្រេចបញ្ចូលទីដោយកីឡាករ Mohamed Salah ។ 

ទោះបីបានមួយពិន្ទុក្នុងដៃក្តី តែអ្នកចាត់ការទូទៅសញ្ជាតិអាល្លឺម៉ង់របស់ក្លិប Liverpool បានបញ្ចេញ​មតិមិនពេញ​ចិត្តនឹងការសម្រេចផ្តល់គ្រាប់បាល់ទី ១ របស់មន្ត្រីអាជ្ញាកណ្តាល ក្រោយបញ្ចប់ការប្រកួតថា៖   ៉ តើខ្ញុំអាចសួរ​ពី​គំនិតអ្នកទាំងអស់គ្នាទេ? យ៉ាងណាក៏ដោយ! ខ្ញុំដឹងថាពួកយើងមិនអាចកែប្រែលទ្ធផលបាននោះ​ទេ។ តែការពិត! ខ្ញុំគិតថាវាច្បាស់ណាស់គឺជាកំហុស។ វាមិនដល់កម្រិតផ្តល់កាតលឿង ឬកាតក្រហមនោះទេ ប៉ុន្តែកីឡាកររបស់ Fulham បានរុញ និងប៉ហះ Mohamed Salah ឲ្យដួល មុននឹងការទាត់បញ្ចូលទីពួកយើង។ ខ្ញុំគិតថា ត្រង់​ចំណុចនេះអាជ្ញាកណ្តាលគួរផ្លុំកញ្ចែរជាមុនសិន។ ខ្ញុំដឹងថាមិនអាចផ្លាស់ប្តូរលទ្ធផល តែខ្ញុំគ្រាន់តែដឹង​ថាវាពិតជាកំហុសពិតមែន។  ៉ 

ក្រោយបញ្ចប់សប្តាហ៍ទី ១២ Liverpool បានបន្តឈរលេខរៀងទី ២ បណ្តោះអាសន្ន ដោយមាន ២៥ ពិន្ទុ ខណៈ​សប្តាហ៍​បន្ទាប់​ត្រូវតតាំងជាមួយក្លិបកំពុងឈរកំពូលតារាង Tottenham Hotspur ៕