បរទេស៖ ប្រធានក្រុមរបស់ក្រុមជម្រើសជាតិ អង់គ្លេស កីឡាករ Harry Kane បានបង្ហាញការកោតសរសើរយ៉ាងខ្លាំងចំពោះ Cristiano Ronaldo ហើយជាមួយគ្នានោះ គាត់បានលើកឡើងថា នៅពេលឃើញខ្សែប្រយុទ្ធរបស់ក្រុម ព័រទុយហ្គាល់ រូបនេះ រកបានគ្រាប់បាល់ទី ៩០១ នៅក្នុងអាជីព ដែលបច្ចុប្បន្នមានវ័យដល់ ៣៩ ឆ្នាំទៅហើយ វាកាន់តែជម្រុញទឹកចិត្តធ្វើឱ្យគាត់ចង់បន្តលេងបាល់ទាត់កាន់តែយូរអង្វែងតាមដែលអាចធ្វើទៅបាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ កាលពីពេលថ្មីៗនេះ Ronaldo ទើបតែបានបំបែកកំណត់ត្រាដ៏ធំមួយ ដោយបានក្លាយជាកីឡាករបាល់ទាត់ដំបូងគេ ដែលអាចរកបានគ្រាប់បាល់សរុបបានចំនួន ៩០០ គ្រាប់នៅក្នុងអាជីព បន្ទាប់ពីស៊ុតបញ្ចូលទីមួយគ្រាប់ទល់នឹងក្រុមជម្រើសជាតិ ក្រូអាត នៅក្នុងការប្រកួតពាន Nations League។ ហើយបន្តមកទៀត គាត់បានរកបានគ្រាប់បាល់ ១ គ្រាប់ទៀត ដែលជាគ្រាប់ទី ៩០១ នៅក្នុងការប្រកួតទល់នឹងក្រុមជម្រើសជាតិ ស្កុតលែនដ៍។
ក្រោយឃើញពីអស្ចារ្យរបស់ Ronaldo បែបនេះ Kane ដែលបច្ចុប្បន្នមានវ័យ ៣១ ឆ្នាំ បានថ្លែងប្រាប់សារព័ត៌មានបរទេសយ៉ាងដូច្នេះថា៖
ខ្ញុំមានអារម្មណ៍ថា ពិតជាមានភាពល្អប្រសើរណាស់ ទាំងផ្លូវកាយ និងផ្លូវចិត្តចំពោះការឈរនៅលើភាពកំពូលក្នុងអាជីពរបស់ខ្ញុំ។ នៅពេលដែលអ្នកបានមើលកីឡាករផ្សេងដូចជា Cristiano Ronaldo ដែលទើបតែរកបានគ្រាប់បាល់ទី ៩០១ នៅក្នុងអាជីពរបស់គាត់កាលពីម្សិលមិញ ហើយទាំងដែលបច្ចុប្បន្នគាត់មានវ័យ ៣៩ ឆ្នាំទៅហើយ វាគឺបានជម្រុញទឹកចិត្តកាន់តែខ្លាំង ធ្វើឱ្យខ្ញុំចង់លេងបាល់ឱ្យបានយូរអង្វែងតាមដែលអាចធ្វើទៅបាន៕
ប្រភព៖ Sportskeeda
Bong I.T