Man UTD គ្រោងយកកូនសោគ្រូ Hag កីឡាករ Zirkzee បូកលុយ ៣០ លានទិញយកខ្សែប្រយុទ្ធ Napoli រូបនេះ

បរទេស៖ ក្លិបបិសាចក្រហម Manchester United ត្រូវបានគេរាយការណ៍ថា ពួកគេចង់យកខ្សែប្រយុទ្ធចំណូលថ្មី Joshua Zirkzee បូកជាមួយនឹងទឹកប្រាក់ចំនួន ៣១​ លានដុល្លារអាមេរិក ដើម្បីដេញថ្លៃយកខ្សែប្រយុទ្ធ Victor Osimhen ពី Napoli។

Zirkzee ត្រូវបាន Man UTD នាំចូលពីក្រុម Bologna កាលពីរដូវក្តៅកន្លងទៅក្នុងតម្លៃ ៤៦ លានដុល្លារអាមេរិក ប៉ុន្តែបន្ទាប់ពីស្នាក់នៅទឹកដី Old Trafford បានត្រឹមតែរយៈពេល ៦ ខែ ឥឡូវនេះខ្សែប្រយុទ្ធសញ្ជាតិ ហូល្លង់ កំពុងស្ថិតនៅក្នុងបញ្ជី ដែលគ្រូថ្មីលោក Ruben Amorim ចង់លក់ចេញហើយ បន្ទាប់ពីរូបគេបង្ហាញសមត្ថភាព មិនបានដូចអ្វីដែលក្លិបរំពឹងទុក ពោលរូបគេរកបានត្រឹមតែ ១ គ្រាប់ប៉ុណ្ណោះ ក្នុងការបង្ហាញខ្លួននៅលើទីលានចំនួន ១៧ ប្រកួត។

យោងតាមការចុះផ្សាយដោយសារព័ត៌មានបរទេស Per Il Mattino បានឱ្យដឹងថា លោក Amorim គឺចង់បង្កើនតំបន់ឱ្យមានភាពខ្លាំងក្លាចាប់ពីពេលនេះតទៅ ហើយលោកបានសម្លឹងឃើញ Osimhen ថាជាជម្រើសដ៏ត្រឹមត្រូវបំផុត។

ប្រភពដដែលបានបន្ថែមថា ក្លិបយក្សរបស់ អង់គ្លេស មួយនេះគ្រោងយកខ្សែប្រយុទ្ធរបស់ខ្លួនកីឡាករ Joshua Zirkzee និងទឹកប្រាក់ចំនួន ៣១ លានដុល្លារអាមេរិក ដើម្បីដេញថ្លៃយកខ្សែប្រយុទ្ធសញ្ជាតិ នីហ្ស៊េរីយ៉ា វ័យ ២៥ ឆ្នាំរូបនេះពីក្លិប អ៊ីតាលី Napoli។

គួរបញ្ជាក់ថា Victor Osimhen គឺនៅសល់កុងត្រាជាមួយ Napoli ២ រដូវកាលទៀត ពោលដល់ខែ មិថុនា ឆ្នាំ ២០២៦ ប៉ុន្តែបច្ចុប្បន្នរូបគេកំពុងត្រូវបានក្លិបដាក់ឱ្យក្លិប តួកគី Galatasaray ខ្ចីជើងមួយរដូវកាល៕

ប្រភព៖ GOAL