តឹងតិចហើយ! បឺត សង្ឃឹម ផ្តាំទៅចំរើន គុនខ្មែរ ថាបើចង់ចូលដណ្តើមខ្សែក្រវាត់ IPCC ពីខ្លួន ត្រូវតែឆ្លងកាត់លក្ខខណ្ឌដ៏ពិបាកមួយនេះឱ្យបានសិន

ប្រដាល់៖ អ្នកលេងចិត្តសាស្ត្របឺត សង្ឃឹម បានទាមទារឱ្យកីឡាករកំពុងឡើងកូដអ្នកលេងរន្ទះជើងមុខសេដចំរើន គុនខ្មែរ ត្រូវតែបំពេញលក្ខខណ្ឌមួយឱ្យបានសិន ប្រសិនបើកីឡាករមកពីក្លិបគុនខ្មែរដូនតារូបនេះ ចង់ចូលដណ្តើមខ្សែក្រវាត់ស្ថាប័ន IPCC ពីខ្លួន។

ជាការពិតណាស់ ចំរើន គុនខ្មែរ បច្ចុប្បន្នកំពុងទទួលបានការចាប់អារម្មណ៍ពីអ្នកគាំទ្រគុនខ្មែរមែនទែន បន្ទាប់ពីរូបគេផ្តួលកីឡាករម្ចាស់ផ្ទះជប៉ុន Ogasawara Eisaku ឱ្យខូចដៃត្រឹមទឹកទី ១ នៅសង្វៀន Knock Out កាលពីចុងឆ្នាំ ២០២៤ កន្លងទៅ។ 

បន្ទាប់ពីការប្រកួតនោះ ចំរើន គុនខ្មែរ ហាក់មានមហិច្ចតាធំមួយទៀត ដោយរូបគេបានបង្ហើបបំណង ថាចង់ចូលដណ្តើមខ្សែក្រវាត់ IPCC ពីបឺត សង្ឃឹម ដែលដណ្តើមបានកាលពីខែ មីនា ឆ្នាំ ២០២៣ ខណៈថ្មីៗនេះ MC Vutha លោកគ្រូឃឹម សុជាតិ ក៏បានចូលចែចូវជាមួយលោកគ្រូសេន ប៊ុនថេន និងបឺត សង្ឃឹមផ្ទាល់ផងដែរ។

ទោះបីជាយ៉ាងណាក៏ដោយ សង្ឃឹម គឺមិនមានការញញើតនឹងដាក់ខ្សែក្រវាត់នេះឱ្យ ចំរើន ចូលមកដណ្តើមនោះទេ ប៉ុន្តែកីឡាករដែលមានដើមកំណើតមកពីខេត្តកំពង់ឆ្នាំងរូបនេះ បានស្នើសុំដាក់លក្ខខណ្ឌដ៏តឹងតែងមួយ ដោយឱ្យចំរើនឆ្លងកាត់ការប្រកួតវិលជុំ ១០ ប្រកួតដូចខ្លួនសិន ចាំមកប្រកួតវគ្គផ្តាច់ព្រ័ត្រចុងក្រោយ ដើម្បីដណ្តើមខ្សែក្រវាត់មួយនេះ។ យ៉ាងណាក៏ដោយ សង្ឃឹម ក៏បានផ្តល់នូវជម្រើសមួយទៀតដែរ ថាបើមិនចង់ប្រកួតវិលជុំ ១០ ប្រកួតទេ ចំរើន ក៏អាចប្រកួតដណ្តើមខ្សែក្រវាត់ផ្សេង ដែលប្រកួតត្រឹមតែមួយប្រកួតដែរ។

គួរបញ្ជាក់ថា មុនយកបានខ្សែក្រវាត់ IPCC Kun Khmer នេះ បឺត សង្ឃឹម ពិតជាធ្វើកាងារធ្ងន់មែនទែន ដោយបានឆ្លងកាត់ការប្រកួតជម្រុះជាមួយកីឡាករជើងខ្លាំងក្នុងប្រភេទទម្ងន់ដូចគ្នាជាច្រើន ក្នុងនោះការប្រកួតជម្រុះក្នុងពូលបានចាញ់ស៊ន រ៉ាគីម ឈ្នះអេលីត សាន់ ម៉ន សាម៉េត ពុទ្ធ សំបូរ និងរឿម វណ្ណៈ ហើយក្រោយមកបានបន្តឈ្នះគង់ ហូវនៅវគ្គពាក់កណ្តាលផ្តាច់ព្រ័ត្រ និងចុងក្រោយបានយកឈ្នះវ៉ាន់ វឿននៅវគ្គផ្តាច់ព្រ័ត្រ។

វីដេអូសម្ភាសន៍៖