Yamal ផ្ដាំទៅ ខ្ញីចាស់ Ronaldo បែបនេះ ក្រោយអេស្ប៉ាញឡើងវគ្គផ្ដាច់ព្រ័ត្រប៉ះព័រទុយកាល់ ថ្ងៃ៩

កីឡា៖ ខ្សែប្រយុទ្ធកំពុងឡើងកូដ Lamine Yamal គឺជាតារាឆ្នើមម្នាក់ដែលកំពុងទទួលបានការចាប់អារម្មណ៍ខ្លាំងណាស់ នាពេលបច្ចុប្បន្ន ដោយស្ថិតក្នុងវ័យត្រឹម១៨ឆ្នាំ Yamal ត្រូវអ្នកគាំទ្រនិងកីឡាករដូចគ្នាសរសើរមិនដាច់ពីមាត់ ដោយអ្នកខ្លះថែមទាំងយកគេទៅប្រៀបធៀបនឹង Lionel Messi ទៀតផង។

កាលពីយប់ឈានចូលថ្ងៃទី៦ខែមិថុនាកន្លងទៅនេះ Yamal ក៌បានបន្តរះនៅលើទីលានយ៉ាងភ្លឺចិញ្ចាច បន្ទាប់ពីស៊ុតបញ្ចូលទី២គ្រាប់ជួយ អេស្ប៉ាញ កក់កៅអីឡើងទៅកាន់វគ្គផ្ដាច់ព្រ័ត្រ UEFA Nations League ដោយអេស្ប៉ាញបានទម្លាក់បារាំង ត្រឹមលទ្ធផល ៥ ទល់នឹង៤ ។

នេះមានន័យថា អេស្ប៉ាញនឹងត្រូវឡើងទៅចួបជាមួយ ក្រុមជម្រើសជាតិព័រទុយកាល់ នាថ្ងៃទី៩ខែមិថុនា ជាការប្រកួតវគ្គផ្ដាច់ព្រ័ត្រ Nations League តែម្ដង ដែលនេះជាជំនួបអ្នកគ្រប់គ្នាទន្ទឹងរង់ចាំដោយ Lamine Yamal នឹងត្រូវប៉ះជាមួយ កំពូលខ្សែប្រយុទ្ធ Cristiano Ronaldo ។

យ៉ាងណាមិញ ក្រោយចប់ការប្រកួតទល់នឹងបារាំងរួចមកYamal បានបង្ហាញការយល់ឃើញទាក់ទងនឹងការលេងទល់នឹង Cristiano Ronaldo ថា៖

"ការលេងទល់នឹង Cristiano? គាត់គឺជាវីរបុរសបាល់ទាត់ម្នាក់។ ខ្ញុំនឹងធ្វើការងាររបស់ខ្ញុំ នោះគឺការលេងឲ្យឈ្នះការប្រកួត គឺមានតែប៉ុណ្ណឹងឯង។"