បរទេស៖ លោក Gary Neville វីរបុរសរបស់ Manchester United ជឿជាក់ថា នៅរដូវកាលក្រោយ Liverpool គឺនឹងក្លាយជាក្រុមតែមួយគត់ ដែលអាចប្រជែងពាន Premier League ជាមួយ Manchester City បាន។
Man City គឺបានក្លាយជាម្ចាស់ជើងឯកពានរង្វាន់ Premier League នៅរដូវកាលនេះផ្លូវការហើយ ក្រោយ Arsenal ភ្លាត់ចាញ់ Nottm Forest ១-០ កាលពីយប់ថ្ងៃ សៅរិ៍ ទី ២០ កន្លងទៅ ខណៈនេះគឺជាលើកទី ៥ ហើយសម្រាប់ក្រុមមេឃខៀវក្នុងការឈ្នះពាន PL ចាប់តាំងពីលោក Pep Guardiola មកដល់។
ចំណែក Liverpool វិញ នៅរដូវកាលនេះហាក់ធ្វើមិនសូវបានល្អប៉ុន្មាននោះទេ ទោះបីជាពួកគេខំចំណាយលុយទិញកីឡាករចូលថ្មីយ៉ាងច្រើនក៏ដោយ ហើយពេលនេះគឺពួកគេឈរនៅលេខរៀងទី ៥ ឯណោះ ប៉ុន្តែទោះបីជាយ៉ាងណាក៏ដោយ លោក Neville នៅតែជឿជាក់ថា រដូវកាលក្រោយក្រុមរបស់លោក Jurgen Klopp នឹងឡើងខ្លាំងវិញ ហើយក្លាយជាគូប្រជែងដ៏ធំបំផុតរបស់ Man City។
ជុំវិញរឿងរ៉ាវខាងលើ, លោក Neville បានមានប្រសាសន៍យ៉ាងដូច្នេះថា៖
នាពេលបច្ចុប្បន្ន អ្នកដែលបានបង្ហាញក្នុងរយៈពេល ៦ ឆ្នាំចុងក្រោយនេះគឺ Liverpool។ ខ្ញុំដឹងថានៅឆ្នាំនេះ Arsenal គឺបានឡើងមកប្រកៀកប្រកិតជាមួយ Man City ប៉ុន្តែខ្ញុំអាចនិយាយបានថា មានក្រុមតែមួយប៉ុណ្ណោះ ដែលអាចក្លាយជាគូប្រជែងដ៏ធំរបស់ Man City ក្រុមរបស់លោក Guardiola នោះគឺលោក Jurgen Klopp និង Liverpool ។ ខ្ញុំដឹងថាពួកគេបានធ្លាក់ទម្រង់លេងបន្តិចរដូវកាលនេះ ប៉ុន្តែអ្នកមិនដឹងថាតើពួកគេនឹងត្រលប់មកខ្លាំងដូចដើមវិញនៅរដូវកាលក្រោយឬអត់នោះទេ ព្រោះពួកគេបានបង្ហាញថាពួកគេអាចធ្វើបានពីមុនមក៕
ប្រភព៖ Metro
