ឥទ្ធិពលហ៊ាស៊ី! បើ Barca យក Messi ត្រឡប់មកវិញបាន នោះក្លិបនឹងអាចចំណេញប្រាក់ក្នុងមួយរដូវកាលបានរហូតដល់ទៅ...

បរទេស៖ ក្លិប Barcelona ត្រូវបានគេរាយការណ៍ថា នឹងអាចរកប្រាក់ចំណូលបានដល់ទៅរាប់រយលានដុល្លារ ប្រសិនបើពួកគេអាចចុះកុងត្រាយកវីរបុរស Lionel Messi ត្រឡប់មកវិញបាន។

ជាការពិតណាស់ មួយរយៈចុងក្រោយនេះហាក់មានព័ត៌មានរសើបមែនទែន ថា Messi នឹងអាចត្រឡប់មកកាន់ Barcelona វិញ បន្ទាប់ពីគាត់មានអារម្មណ៍មិនសប្បាយចិត្ត ចង់ចាកចេញពី Paris Saint-Germain ដែលជាក្លិបបច្ចុប្បន្នរបស់ខ្លួន។

យោងតាមការចុះផ្សាយរបស់កាសែត Mundo Deportivo បានឱ្យដឹងថា Messi នឹងក្លាយជាអ្នកដែលរកប្រាក់ឈ្នួលខ្ពស់ជាងគេនៅ Barcelona ប្រសិនបើគាត់សម្រេចចិត្តត្រឡប់មកទ្រនំចាស់វិញ។

ទោះជាយ៉ាងណាក៏ដោយ ការត្រលប់មកវិញរបស់ Messi នឹងក្លាយជាផលចំណេញដ៏ធំមួយសម្រាប់ក្លិប ដោយក្លិបនឹងអាចកើនឡើងប្រាក់ចំណូលបានរហូតដល់ទៅ ២៥ ភាគរយឯណោះ។ បើតាមការ​ចុះ​ផ្សាយ​របស់ប្រព័ន្ធផ្សព្វផ្សាយ​អេស្ប៉ាញ​បាន​ឱ្យដឹងថា​ វត្តមានខ្សែប្រយុទ្ធសញ្ជាតិ អាហ្សង់ទីន នឹង​អាចជួយឱ្យក្លិបអ្នកមានបុណ្យរកប្រាក់ចំណូលបានរហូតដល់ទៅ​ ២០០​ លាន​អឺរ៉ូ​ ឬប្រមាណជា (២១៥ លានដុល្លារអាមេរិក) ទៅ​៣០០​លាន​អឺរ៉ូ ឬប្រមាណជា (៣២២ លានដុល្លារអាមេរិក) ឯណោះ​ក្នុង​មួយ​រដូវ​កាល៕

ប្រភព៖ Sportskeeda