ត្រៀមតែឆ្ងាញ់ភ្នែកទៅ! បើគ្មានអ្វីប្រែប្រួលទេ ពេជ្រ សម្បត្តិ នឹងជួប Gomba ម្តងទៀតនៅថ្ងៃបុណ្យអ៊ុំទូក ម្តងនេះប្រកួតក្នុងលក្ខខណ្ឌដ៏កក្រើកមួយនេះ និង រង្វាន់ធំទៀត

ប្រដាល់៖ ដឹងតែផ្អើលទៀតហើយបងប្អូន បើគ្មានអ្វីប្រែប្រួលទេ ក្របីព្រៃ ពេជ្រ សម្បត្តិ នឹងត្រូវជួបប្រកួតគ្នាជាមួយ កីឡាករអាហ្វ្រិកខាងត្បូង Ncedo Gomba ម្តងទៀត ប្រកួតបែបហ្គង់ចេញម្រាម ៥ទឹក នៅថ្ងៃទី១៦ ខែវិច្ឆិកា ខាងមុខនេះ ត្រូវនឹង ថ្ងៃទី៣ នៃពិធីបុណ្យអ៊ុំទូក ដែលរៀបចំឡើងនៅសង្វៀនគ្រុឌគុនខ្មែរ។

ជាការពិតណាស់ បើយើងបកក្រោយបន្តិច កាលពីថ្ងៃទី ២៨ ខែខែកញ្ញា កន្លងទៅ គឺ ពេជ្រ សម្បត្តិ បានរបូតខ្សែក្រវាត់គ្រុឌគុនខ្មែររបស់ខ្លួនមួយខ្សែទៅកាន់ Gomba ក្រោយប្រកួតគ្នាយ៉ាងស្វិតស្វាញពេញ ៥ទឹក ក្របីព្រៃចាញ់ពិន្ទុ ខណៈ ក្រោយចប់ការប្រកួតនោះ អ្នកគាំទ្រក៏មានការមិនអស់ចិត្ត និង ចង់ទស្សនាការប្រកួតរបស់អ្នកទាំងពីរម្តងទៀតដើម្បីឲ្យដាច់ស្រាច់។

ដូច្នេះហើយ នៅពេលនេះ ទោះមិនទាន់មានការប្រកាសផ្លូវការ ប៉ុន្តែ តាមព័ត៌មានដែលយើងទទួលបាន គឺ ពេជ្រ សម្បត្តិ និង Gomba នឹងត្រូវជួបគ្នាម្តងទៀត នៅថ្ងៃទី១៦ ខែវិច្ឆិកា ខាងមុខនេះ អ្វីដែលពិសេស គឺ អ្នកទាំងពីរនឹងប្រកួតគ្នាបែបហ្គង់ចេញម្រាម ៥ទឹកពេញ រិតតែពិសេសពួកគេនឹងប្រកួតគ្នាដណ្តើមខ្សែក្រវាត់ថ្មីមួយគ្រឿងទៀត អមជាមួយទឹកប្រាក់រង្វាន់ផ្សេងៗ៕