បរទេស៖ អ្នកចាត់ការថ្មីរបស់ Manchester United លោក Ruben Amorim បានសម្តែងការអរគុណ និងបានផ្តល់គុណសម្បត្តិធំទៅកាន់អតីតគ្រូបណ្តោះអាសន្នលោក Ruud van Nistelrooy ថាជាអ្នកដុសខាត់សមត្ថភាព Amad Diallo ឱ្យមានភាពល្អប្រសើរ ទើបរូបគេបន្តធ្វើបានយ៉ាងល្អក្រោមការដឹកនាំរបស់លោក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាការពិតណាស់ Amad Diallo ដែលបច្ចុប្បន្នមានវ័យ ២២ ឆ្នាំ រូបគេគឺជាកីឡាករវ័យក្មេង ដែលមានទេពកោសល្យខ្ពស់បំផុតម្នាក់ ប៉ុន្តែកាលពីមុន រូបគេគឺពុំសូវមានឱកាសចូលលេងច្រើននោះទេ រហូតទាល់តែលោក Van Nistelrooy ចូលដឹកនាំ Man UTD ជាគ្រូបណ្តោះអាសន្ន ៤ ប្រកួត ទើបរូបគេទទួលបានឱកាសចូលលេងញឹកញាប់ រហូតបង្ហាញសមត្ថភាពកាន់តែល្អខ្លាំងឡើងៗមកដល់បច្ចុប្បន្ន ក្រោមការដឹកនាំរបស់លោក Amorim។
យ៉ាងណាមិញ នៅក្នុងការប្រកួតសប្តាហ៍ទី ១៣ នៃក្របខណ្ឌ Premier League នាយប់ថ្ងៃទី ១ ខែ ធ្នូម្សិលមិញនេះ Amad Diallo ពិតជាធ្វើបានល្អមែនទែន ដ្បិតរូបគេមិនបានររួមចំណែករកបានគ្រាប់បាល់ក្តី ដោយក្នុងនោះរូបគេបានដើរតួយ៉ាងសំខាន់ក្នុងការនាំបាល់លេង ចុះជួយការពារ និងបាន assist ឱ្យមិត្តរួមក្រុម ២ គ្រាប់ទៀតផង។
ក្រោយបញ្ចប់ការប្រកួតភ្លាម លោក Ruben Amorim បាននិយាយពី Amad Diallo យ៉ាងដូច្នេះថា៖
ខ្ញុំគិតថា វាគឺជារឿងល្អខ្លាំងណាស់ ដែល Amad Diallo គាត់បានរីកចម្រើនសមត្ថភាពច្រើន។... គាត់គឺជាកីឡាករដែលមានទេពកោសល្យខ្ពស់ម្នាក់។... គាត់គឺធ្វើបានល្អម្តងហើយម្តងទៀត។ Ruud van Nistelrooy គឺបានជួយគាត់ច្រើនណាស់នៅក្នុងរឿងនេះ ហើយឥឡូវគាត់កំពុងតែជួយខ្ញុំវិញម្តង។ គាត់គឺអស្ចារ្យណាស់ក្នុងពេលឥឡូវនេះ ប៉ុន្តែរឿងនេះ គឺបានចាប់ផ្តើមឡើងដោយសារ Ruud។ ដូច្នេះខ្ញុំសូមផ្តល់គុណសម្បត្តិនេះទៅឱ្យ Ruud ដែលគាត់គឺជាអ្នកបណ្តុះ Amad ឡើង៕
ប្រភព៖ Sportbible
Bong I.T