អីយ៉ាស់! Man UTD កំពុងចាប់អារម្មណ៍លើខ្សែប្រយុទ្ធ កូរ៉េខាងត្បូង រូបនេះដើម្បីមកជំនួស Rashford តែមិនមែន Son ទេ

បរទេស៖ ក្លិបបិសាចក្រហម Manchester United ត្រូវបានគេរាយការណ៍ថា កំពុងរៀបចំផែនការផ្ទេរដ៏គួរឱ្យភ្ញាក់ផ្អើលមួយ លើកីឡាករដែលនឹងអាចមកជំនួស Marcus Rashford ស្របពេលខ្សែប្រយុទ្ធសញ្ជាតិ អង់គ្លេស វ័យ ២៧ ឆ្នាំរូបនេះកំពុងមានព័ត៌មានយ៉ាងក្តៅគគក់ ថានឹងអាចចាកចេញពីទឹកដី Old Trafford នៅខែ មករា នេះ។

ជាការពិតណាស់ នៅរដូវកាលថ្មី ២០២៤-២០២៥ នេះ ហាក់មិនមែនជារដូវកាលដ៏ល្អទាល់តែសោះសម្រាប់ Rashford ដោយថ្មីៗនេះរូបគេទើបតែមានរឿងល្អក់កករជាមួយនឹងអ្នកចាត់ការថ្មីលោក Ruben Amorim បន្ទាប់ពីលោកបានដកឈ្មោះរូបគេចេញប៉ុន្មានប្រកួត ហើយជាមួយគ្នានេះ ក៏មានព័ត៌មានបានចុះផ្សាយថា រូបគេចង់ចាកចេញពីទឹកដី Old Trafford ដែលជាទ្រនំនៃការចាប់ផ្តើមអាជីពរបស់គេផងដែរ។

យោងតាមការចុះផ្សាយដោយសារព័ត៌មាន Matteo Moretto បានឱ្យដឹងថា Man UTD ឥឡូវនេះបានរៀបចំផែនការហើយស្រេច ដើម្បីរកអ្នកមកជំនួស Rashford ហើយបច្ចុប្បន្នពួកគេកំពុងតែតាមសង្កេតមើលយ៉ាងយកចិត្តទុកដាក់លើខ្សែប្រយុទ្ធស្លាបសញ្ជាតិ កូរ៉េខាងត្បូង របស់ Paris Saint-Germain កីឡាករ Lee Kang-in។

យ៉ាងណាក៏ដោយ នេះអាចថាជាពេលដ៏ល្អមួយសម្រាប់ Man UTD ព្រោះថាខ្សែប្រយុទ្ធសញ្ជាតិ កូរ៉េខាងត្បូង វ័យ ២៣ ឆ្នាំរូបនេះ កំពុងពិចារណាចង់ចាកចេញពី PSG នៅខែ មករា នេះ ទោះបីជានៅរដូវកាលនេះរូបគេបានលេងជាប់លាប់ក៏ដោយ ប៉ុន្តែមានបញ្ហាមួយរបស់ក្រុមបិសាចក្រហម បើពួកគេចង់បាន Lee Kang-in ពិតមែន នោះពួកគេនឹងត្រូវប្រជែងគ្នាជាមួយ Arsenal ជាមុនសិន៕

ប្រភព៖ Sportbible