បរទេស៖ មហាសេដ្ឋី អាមេរិក លោក Elon Musk ត្រូវបានគេរាយការណ៍ថា កំពុងចាប់អារម្មណ៍ចង់ទិញយកក្លិបកំពូលមួយនៅក្របខណ្ឌ Premier League របស់ អង់គ្លេស នេះបើតាមការបង្ហើបតម្រុយខ្លះៗដោយឪពុកបង្កើតរបស់គាត់គឺលោក Errol Musk។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោក Elon Musk ដែលបច្ចុប្បន្នជានាយករបស់ក្រុមហ៊ុន SpaceX និង Tesla ត្រូវបានគេស្គាល់ថា ជាមហាសេដ្ឋីដែលមានជាងគេបំផុតម្នាក់នៅក្នុងពិភពលោក ហើយបើតាមរបាយការណ៍របស់ទស្សនាវដ្តី Forbes បានឱ្យដឹងថា លោកគឺមានទ្រព្យសម្បត្តិសរុបចំនួន ៤២៥.២ ពាន់លានដុល្លារអាមេរិក។
ថ្មីៗនេះមានរបាយការណ៍ដ៏គួរឱ្យភ្ញាក់ផ្អើលមួយ ដែលជាការអះអាងដោយ Weekend Sport បានឱ្យដឹងថាបុរសញ្ជាតិ អាមេរិក គឺមានបំណងចង់ទិញយកក្លិបហង្សក្រហម Liverpool ដែលកំពុងស្ថិតនៅលើកំពូលតារាងនៃលីគ Premier League របស់ អង់គ្លេស។
យ៉ាងណាក៏ដោយ ទាក់ទងនឹងរឿងនេះអាចថាជាភាពមន្ទិលមួយសម្រាប់អ្នកគាំទ្រ ប៉ុន្តែបើតាមការបង្ហើបដោយឪពុកបង្កើតរបស់គាត់ប្រាប់ទៅកាន់វិទ្យុ Times Radio គឺរឿងនេះ ជារឿងពិតប្រាកដមែន។
ថ្មីៗនេះវិទ្យុ Times Radio បានសួរទៅលោក Errol Musk ថា៖
តើកូនប្រុសរបស់លោកចង់ទិញយកក្លិប Liverpool មែនទេ?
ភ្លាមនោះលោក Errol Musk បានឆ្លើយតបទៅវិញថា៖
ខ្ញុំមិនអាចបរិយាយនៅលើរឿងនេះបានទេ ព្រោះពួកគេនឹងអាចបង្កើនតម្លៃ។ បាទ គាត់បានបង្ហើបបំណងលើរឿងនេះមែន ប៉ុន្តែមិនមែនមានន័យថាគាត់នឹងទិញយកវាទេ។ បាទ គាត់ចង់បានវា។ ជាក់ស្តែងនរណាក៏ចង់បានដែរ រួមទាំងខ្ញុំផង។ លោកយាយរបស់គាត់បានកើតនៅទីក្រុង Liverpool ហើយពួកយើងគឺមានសាច់ញាតិនៅទីក្រុង Liverpool...។ ដូច្នេះពួកយើងគឺមានភាពផ្សារភ្ជាប់ជាមួយ Liverpool ដូចដែលអ្នកបានដឹងហើយ៕
ប្រភព៖ Sportbible
Bong I.T