សៀមរាប យូណាយធីត ប្រកាសរើសយុវជន U12 បន្ទាប់ពីក្លាយជាសមាជិកសហព័ន្ធបាល់ទាត់កម្ពុជា

កម្ពុជា៖ ក្លិបបាល់ទាត់ សៀមរាប យូណាយធីត ដែលទើបត្រូវបានសហព័ន្ធកីឡាបាល់ទាត់កម្ពុជា (FFC) ប្រកាសទទួលស្គាល់ជាសមាជិកអង្កេតការណ៍ជាផ្លូវការ កាលពីថ្ងៃទី ២៩ ខែ ឧសភា ឆ្នាំ ២០២១ ពេលនេះបានបន្តបោះជំហានមួយកម្រិតទៀត ដោយធ្វើការប្រកាសជ្រើសរើសយុវជនថ្នាលខ្លួនក្នុងកម្រិតអាយុក្រោម ១២ ឆ្នាំ (U-12) ។ 

ក្នុងពីព្រឹកនេះថ្ងៃទី ៣១ ខែ ឧសភា ឆ្នាំ ២០២១ ក្លិបមានមូលដ្ឋាននៅខេត្តសៀមរាប ខាងលើបានប្រកាសលើបណ្តាញគណនីសង្គមផ្លូវការ Facebook របស់ខ្លួនអំពីការប្រកាសជ្រើសរើសយុវជនថ្នាលកម្រិតអាយុក្រោម ១២ ឆ្នាំ (U12) ដោយចាប់ផ្តើមទទួលពាក្យពីពេលនេះតទៅ រហូតដល់ថ្ងៃទី ១៣ ខែ មិថុនា ឆ្នាំ ២០២១ ។ 

បើតាមព័ត៌មានលម្អិតពីខាងក្លិបផ្ទាល់ឲ្យដឹងថា ក្រោយស្ថានភាពកូវីដ-១៩ ស្ងប់ស្ងាត់ទៅវិញ ក្លិបមានកីឡដ្ឋានស្តង់ដារ អេស អរ យូ នេះនឹងធ្វើការតេស្តសមត្ថភាព ដើម្បីជ្រើសរើសដោយផ្ទាល់ពីសំណាក់គ្រូបង្វឹករួមមានសញ្ជាតិខ្មែរ និងបរទេសផងដែរ។ ចំពោះព័ត៌មានលម្អិតអំពីកាលបរិច្ឆេទធ្វើតេស្ត ក្លិបនឹងជូនជាដំណឹងតាមពេលក្រោយ។ 

គួរបញ្ជាក់ផងថា ក្លិបបាល់ទាត់ សៀមរាប យូណាយធីត ត្រូវបានបង្កើតឡើងនៅក្នុងឆ្នាំ ២០១៩ ដោយបច្ចុប្បន្នភាពមានកីឡដ្ឋាន អេស អរ យូ ដែលកំពុងជួលជាសហម្ចាស់ផ្ទះដល់ក្លិបអង្គរថាយហ្គឺរ និងក្លិបសូលទីឡូអង្គរ ចូលរួមប្រកួតក្នុងពានរង្វាន់លីគកំពូលកម្ពុជា និងពានរង្វាន់សម្តេច ហ៊ុន សែន ខាប់។ 

ការជ្រើសរើសយុវជនថ្នាលក្រោមអាយុ ១២ ឆ្នាំ (U-12) នេះដើម្បីសម្រួច ឬជាការបោះជំហានបន្ត បន្ទាប់ពីទទួលបានជាសមាជិកអង្កេតការណ៍របស់សហព័ន្ធកីឡាបាល់ទាត់កម្ពុជា ក្នុងមហាសន្និបាតឆ្នាំ ២០២១ កន្លងទៅថ្មីៗ ៕ 

រូបភាព៖ Siem Reap United & SRU Stadium