ម្ចាស់មេដាយមាស គុនខ្មែរពីររូប សុខ រិទ្ធ និង ទូច ចាន់វត្តី បង្ហាញ​ឈុត​​ឯកសណ្ឋាន ទទួលបានក្របខ័ណ្ឌរដ្ឋ

កម្សាន្ដ៖ ជាការពិតណាស់ បងប្អូនអ្នកនិយមស្នេហា វិស័យកីឡាប្រដាល់គុនខ្មែរ បានជ្រាបរួចមកហើយថា នៅក្នុងព្រឹត្តិការណ៍កីឡាស៊ីហ្គេមលើកទី៣២​ ដែលកម្ពុជា ធ្វើជាម្ចាស់ផ្ទះនោះ បានដាក់កីឡាជាតិ ប្រដាល់គុនខ្មែរចូល ដើម្បីប្រកួត ដោយជាក់ស្ដែង យើងឃើញថា ទាំងកីឡាករ និងកីឡាការិនី របស់កម្ពុជា ផ្នែកប្រដាល់គុនខ្មែរជាច្រើនរូប បានយកឈ្នះទៅលើគូប្រកួត របស់ខ្លួនរាងៗខ្លួន ដើម្បីឈានដល់ការដណ្ដើម មេដាយជូនដល់ជាតិមាតុភូមិផងដែរ។

ដោយឡែក កីឡាករ និងកីឡាការិនី ប្រដាល់គុនខ្មែរពីររូប ដែលជាម្ចាស់មេដាយមាស នៅក្នុងព្រឹត្តិការណ៍កីឡាស៊ីហ្គេម២០២៣ ពោលកីឡាករ សុខ រិទ្ធ និងកីឡាការិនី ទូច​ ចាន់វត្តី បានបង្ហាញរូបភាព ស្លៀកពាក់ឈុត ឯកសណ្ឋាន ដែលទទួលបានឈ្មោះ ចូលក្នុងក្របខ័ណ្ឌរដ្ឋ យ៉ាងស្រស់ស្អាត ស្រស់សង្ហា ក្រោយពួកគេទាំងពីរ បានដណ្ដើមមេដាយមាសយកមកជូនជាតិ ផ្នែកកីឡាប្រដាល់គុនខ្មែរ។

លើសពីនេះ មហាជន និងបងប្អូននៅក្នុងបណ្ដាញសង្គម បានចូលរួមត្រេកអរ អបអរសាទរ ដោយក្ដីរំភើប រីករាយ ក្នុងការដែលពួកគេ ទទួលបានក្របខ័ណ្ឌរដ្ឋ ថាពិតជាសាកសម ចំពោះការខិតខំ តស៊ូ របស់ពួកគេកន្លងមកនេះ ដែលបានខំប្រឹងដណ្ដើមយកមេដាយមាស ផ្នែកកីឡាប្រដាល់គុនខ្មែរ ក្នុងនាមយើងជាម្ចាស់ក្បាច់គុន និងជាម្ចាស់ផ្ទះ នៃព្រឹត្តិការណ៍កីឡាអាស៊ីអាគ្នេយ៍លើកទី៣២នេះ៕

សូមទស្សនារូបភាពខាងក្រោម៖