គ្រូបង្វឹករូបនេះ នឹងមិនមានវត្តមានក្នុងការឈរបញ្ជាកូនក្រុមលើទីលាននោះទេ ក្នុងជំនួបប៉ះគ្នានៅ UCL យប់ស្អែក

បរទេស៖ លោកគ្រូ Thomas Tuchel បានជាប់បម្រាមមិនអាចឈរដឹកនាំកូនក្រុមនៅលើទីលាន នៅពេលដែល Bayern Munich ស្វាគមន៍ Manchester United ទៅកាន់ Allianz Arena នៅល្ងាចថ្ងៃពុធ នោះទេ។

Bayern និង Man UTD ប្រឈមមុខដាក់គ្នាក្នុងការប្រកួតវគ្គចែកពូល UEFA Champions League ជាលើកទីមួយរបស់ពួកគេក្នុងរដូវកាលនេះ ដែលជាការប្រកួតដ៏ជក់ចិត្តមួយនៅតំបន់អឺរ៉ុប។ ក្រុមទាំងពីរត្រូវបានចាប់ឆ្នោតជួបគ្នា ក្នុងពូល A រួមជាមួយក្រុម Kobenhavn និង Galatasaray ។ 

សម្រាប់ដែល Tuchel ត្រូវបានជាប់បម្រាម ក្នុងជំនួបទល់នឹង Man Utd គឺដោយសារ តែរដូវកាលមុន ក្នុងការប្រកួតចុងក្រោយបង្អស់របស់ Bayern នៅក្របខ័ណ្ឌ Champions League គ្រូបង្វឹកសញ្ជាតិអាល្លឺម៉ង់ ត្រូវបានអាជ្ញាកណ្ដាល ពិន័យកាតក្រហម ត្រូវបណ្ដេញចេញពីទីលាន ។

អតីតគ្រូបង្វឹក Chelsea បានទទួលកាតក្រហម សម្រាប់ការប្រកួតជើងទី ២ របស់ Bayern ទល់នឹង Man City ដែលជាការប្រកួតដែលពួកគេបានស្មើ ១-១បន្ទាប់ពីរងបរាជ័យក្នុងលទ្ធផល ៣-០ ក្នុងជើងទី ១ ៕

ប្រភព៖ 90min