លោក Arteta បញ្ជាក់ច្បាស់ៗថា កីឡាករ Arsenal ៤រូបនេះនឹងចាកចេញពីក្លិប

កីឡា៖ គ្រូបង្វឹកក្រុមកាំភ្លើងធំ Arsenal គឺលោក Mikel Arteta បានបញ្ជាក់ឲ្យដឹងថាកីឡាករ៤រូបរួមមាន Kieran Tierney, Jorginho, Neto និង Raheem Sterling នឹងចាកចេញពីទឹកដី Emirates នៅរដូវក្ដៅនេះ។

លោកបានប្រកាសបែបនេះ បន្ទាប់ពី Arsenal បានក្លាយជាក្លិបដែលមិនបានឈ្នះពានអ្វីសោះនារយៈពេល៥រដូវកាលចុងក្រោយនេះហើយការចាកចេញរបស់ កីឡាករទាំងបួននេះ គឺដោយសារក្រុមចង់ផ្លាស់ប្ដូរកីឡាករថ្មីៗ ដើម្បីមានឱកាសអាចប្រជែងពាននារដូវកាលក្រោយៗ។

បន្ទាប់ពីចប់ការប្រកួតទល់នឹង Southampton កាលពីថ្ងៃអាទិត្យកន្លងទៅ លោក Arteta បានបញ្ជាក់ថា៖

"វាពិតជាសំខាន់ក្នុងការឈ្នះការប្រកួតមួយនេះ វាក៏សំខាន់ក្នុងការនិយាយថាលាទៅកាន់កីឡាករមួយចំនួនដែលបានចាកចេញពីក្លិប ដើម្បីអរគុណដែលពួកគេបានរួមចំណែកជួយក្លិបដូចជា Kieran ដែលបាននៅជាមួយពួកយើងអស់រយៈពេល៦ឆ្នាំ, Jorginho ដែលពួកយើងបានលើកទឹកចិត្តគេព្រមទាំង Neto និង Raheem ផងដែរ។"

Raheem Sterling និង Neto ដែលផ្លាស់មកទឹកដី Emirates ក្នុងលក្ខខណ្ឌខ្ចីជើងនឹងត្រឡប់ទៅក្លិប Chelsea និង Bournemouth វិញ។ Jorginho អាចនឹងចូលរួមជាមួយ Flamengo ហើយ Kieran Tierney ទំនងជាផ្លាស់ទៅក្លិប Celtic ៕

ប្រភព៖ sportskeeda