លោក Pep ថាទាល់តែ Yamal ធ្វើបែបនេះសិន ទើបលោកជឿថាគេអស្ចារ្យដូច Messi

កីឡា៖ លោកគ្រូបង្វឹកក្លិប Manchester City គឺលោក Pep Guardiola បានបង្ហាញការយល់ឃើញថា ថ្វីត្បិតមានអ្នកគាំទ្រក៏ដូចជាកីឡាករជាច្រើនបានប្រៀបធៀបសមត្ថភាព Lamine Yamal ទៅនឹង Lionel Messi ក៏ដោយក៏លោកគិតថា Yamal នៅត្រូវអភិវឌ្ឍខ្លួនវែងឆ្ងាយទៀត គឺពុំអាចនិយាយថាគេគឺដូចជា Messi នោះទេ។

ពិតណាស់ Lamine Yamal ជាយុវជនឆ្នើមនិងកីឡាករជួរមុខរបស់ Barcelona បានក្លាយជាកីឡាករដ៏អស្ចារ្យម្នាក់ក្នុងពិភពបាល់ទាត់នាពេលបច្ចុប្បន្ន ដោយមកទល់ពេលនេះ យុវជនអាយុ១៨ឆ្នាំម្នាក់នេះ បានស៊ុតបញ្ចូលទី១៨គ្រាប់ នារដូវកាលនេះសម្រាប់ក្លិប ហើយទាំងសមត្ថភាពនៃការញាក់បាល់ និងការលេងនៅលើទីលាន គឺពិតជាធ្វើឲ្យមានការកោតស្ញប់ស្ញែងខ្លាំងណាស់ រហូតមានអ្នកប្រៀបធៀបថាគេនឹងក្លាយជា Lionel Messi នាពេលអនាគត។

យ៉ាងណាមិញ លោក Pep បានបង្ហាញការយល់ឃើញថា៖ "នៅអាយុវ័យក្មេងសោះ គេត្រូវបានយកទៅប្រៀបធៀបនឹង Messi អូហ៍! ព្រះជាម្ចាស់អើយ! គេប្រហែលជាកីឡាករដ៏អស្ចារ្យណាស់ហើយ ព្រោះបើមានមនុស្សជាច្រើនមើលឃើញគេបែបនេះគឺ វាច្បាស់ណាស់ហើយថាគេពិតជាពិសេសមែន។ តែជំហានដំបូង គេត្រូវតែកសាងអាជីពបាល់ទាត់របស់គេសិន បើសិនជាអាជីពនោះឈានមកដល់ទីបញ្ចប់ទើបយើងអាចសរុបថាគេបានលេងដល់កម្រិតមួយណា។ ឲ្យគេលេងសិនទៅ និងចាំមើលអាជីពបាល់ទាត់របស់គេ...ខ្ញុំសង្ឃឹមថានៅចុងបញ្ចប់ វានឹងអស្ចារ្យដូចអាជីពបាល់ទាត់របស់ Messi និងជោគជ័យដូច Messi ។ ការលេងបាល់រៀងរាល់បីថ្ងៃម្ដងៗ អស់រយៈពេល១៥ឆ្នាំ គឺពិតជាត្រូវការទម្លាប់ និងទម្លាប់បែបនេះគឺពិតជាពិបាកនឹងសម្រេចបានក្នុងពិភពបាល់ទាត់។"